قالوا علامـك تختصر في بيوتك= قلت اتركوني ذا مزاجي وكيفي
قالوا نصيحه قلت يالله ثبوتك= وتدلني وآقول قولٍ شريفي
ان دلّ قلّ الهرج والاّ سكوتك= ياللي تقول انّك فهيم وعريفي
واخذ مرد العلم قبلٍ يفوتك= لاتعترض ضربات رمحٍ وسيفي
اللاّعب الماهر تحذّر يشوتك= فانّه لياما شات شوته عنيفي
ويارجل لاحصّلت شربك وقوتك= فابقى على ما قيل شخصٍ عفيفي
لاتقرب الزلاّت تفرح شموتك= وتجي علومك بين غبّه وسيفي
ولسانك حصانك تحذّر فلوتك= يجرحك جرحٍ ويتطور نزيفي
ولا كثّروا فالذّم فالزم صموتك= مالك ومال الناس خلّك حفيفي
واحذر تكثّر فالمجالس نكوتك= تذهب حيا وجهك وتصبح سخيفي
واليا لفاك الضيف جنب نهوتك= واشرح له الخاطر بهرجٍ نظيفي