ألا يالله ياللي نلتجيلك في رخا ودهور = تروف بنا وترحمنا ليا جاء يوم الأهوالي
وتجعلنا من اللي يسعدون بجنتك والحور = وبعيدٍ عن لظى نارك وما فيها من الصّالي
سلامٍ من محبٍ مخلصٍ مثل الدرر منثور = يسوقونه بني واهب لكم الأول مع التالي
سلام الله سلام الله على أهل المجلس المعمور = بني منبه عموماً كلهم رجال رجالي
وسلام الله لشيخ الشمل شيخ بالفعل مشهور = تسمى بيشة إبن عمير بإسمه عبر الأجيالي
وسلام الله سلام للحريزي مع شعاع النور= سلامٍ من سنا نوره جميع الناس تهتالي
وسلامٍ للحضور ومن لفا للحفل والجمهور = سلامٍ وافيٍ منّا وللشّيخ إبن هيالي
وسلامٍ عدّ همالٍ سرى فوق الأراضي البور = وعدد ما في الجزيرة كلها من نبت ورمالي
حضرنا للحفل ومشاركين بفرحة الدكتور = زواجك والتخرج سرنّا يا طيّب الفالي
تعبت ونلت من بعد التعب ونقول لك مشكور = وترى اللي ما تعب عسر عليه المرقب العالي
حضرنا يا علي والكل منا مبتهج مسرور = بعد ماجاتنا الدعوة مع مرسولك الغالي
دعانا شايبك جعل الله يخليه راعي الشور = وعسى شيبانه اللي عقبوه بخير منزالي
أبوعبدالله اللي بر شيبانه وهو مبرور = كريم يدين طلق حجاك للعسرات شيالي
أبوعبدالله اللي ما ذخر من دونكم مذخور = بذل من شانكم جهده وما يملك من أموالي
وحان الآن قطف أثمار جُهْده وأستلمتوا الدور = وترى له منهج ما جاه رديان ولا أنذالي
كفانا الله وإياكم شرور أهل الفتن والجور = ورزقنا منهج الوافين من أقوال وأفعالي
هل الدين الحنيف اللي عملهم دايم مأجور = مكانتهم عليَّة والعُــلا مضرب للأمثالي
هذا ما قاله إبن وهّيبٍ صِدْقٍ بليا زور = مشاعر صادقة بأمر الكريم الحاكم الوالي
ونهايتها صلاة الله على المرسول والمأمور = على محمد رسول الله عدد ما هل همالي