يا الله ياللي دايم الدوم نذكرك = يا مجملٍ ليلك بلمعة إنجومك
يا ربنا المعبود مخزي هل الشرك = ماحي ظلام الليل بأنوار يومك
خالق بني آدم منفذ أوامرك = أحدٍ ضعيف إعزوم وأحدٍ إنعومك
والكفو من نيبال ولاّ من الترك = ما تعرفه ولاً من أطراف قومك
إسمه كفو يفرك إخشوم العدا فرك = وليا نخيت الكفو قوّا إعزومك
ولا كل من تنخاه يا رجل قدّرك = ولا كل من تنصاه يقضي لزومك
ولا كل من تقضي لزومه بيشكرك = ولا كل من واجهك يبغي علومك
وإحرص من اللي لا تغافلك يغدرك = وإحرص شبابك لا يضيعه نومك
وإحرص من اللي لأغتنا عنك يطمرك = وإحرص تبيع اللي بروحه يسومك
وأبوك مهما قال له حق يأمرك = ويوجهك لا أخطيت وأيضا يلومك
وأحيان نظرة عين من بوك تنهرك = إفطن لعين العود ربي يدومك
وأحسن خفايا النفس وإعتن بمظهرك = وحافظ على الأسرار حفظك إهدومك
وإبليس وإن جاك إقهره قبل يقهرك = وقفل طريقه لأنه أقوى إخصومك
ومن جنّة الفردوس تكفى لا يظهرك = وتمسّك بخمسك وحجك وصومك
وإعمل ليوم فيه ربك بيحشرك = أما سعة ولاّ تزايد إهمومك
وعلى رسول الخير قدوتك منذرك = في روحتك سلّم وصَل بقدومك