يارب تشرح فوادي .. وتدلني للرشادي = وهداك ياخير هادي .. مطلب وغاية ثمينه
يا خالقي يا إلاهي .. إرفع مقامي وجاهي = وعنّي تصد الدواهي .. وألطف بعبدك وعينه
وللخير يارب عِنَّا .. وإبليس تبعده عَنَّا = وعبدٍ لأجلك تَعَنَّا .. يارب عزّه بدينه
من بعدها يا جماعة .. عمل بليا قناعة = ولو قلت سمعٍ وطاعة .. نفسك بتبقى حزينه
وترا الوطن له مكانة .. حافظ عليها بأمانة = وأبعد عن أهل الخيانة .. يابو اليدين الأمينه
وطنك هو راس مالك .. هو مكسبك هو حلالك = علّم به أصغر عيالك .. فيه الحرم والمدينه
وإحفظ صلاتك وصلّي .. وإبليس خلّه يولّي = وإفهم كلامي وقلّي .. والقول وفّه بحينه
كم واحدٍ ما يبينا .. يغتاظ لا ما لفينا = يصبح ويمسي حزينا .. عايش حياته غبينه
وبعض البشر يا سلامي .. لا جاء نهار الزحامي = في المبتدأ والختامي .. تسمع صداه وحنينه
وشحصٍ على الكذب ضاري .. له ما يطول إنتضاري = ولو قالوا إنه حضاري .. السور بيني وبينه
واللي بالأعراض ياكل .. ويحب زرع المشاكل = ولو سكّتوه إيتأآكل .. خبيث نفسٍ وطينه
والكذب راعيه خلّه .. وإحذر تجيه بمحلّه = وليا لقيته فزلّه .. وعلى الخطأ لا تعينه
وأبعد عن أهل المعاصي .. إللي بدون إختصاصي = وللشّر فيهم تواصي .. ما بينهم جاعلينه
والنّاس ماهم سويّه .. في الجنس ولاّ الهويّه = حتّى الخويّ وخويّه .. كلٍ يشاهد بعينه
ويامرحباً بالحبايب .. والأصدقاء والقرايب = إعداد هب الهبايب .. في بر ولاّ مدينه
واللي بقلبي محلّه .. سيفٍ صقيلٍ نسلّه = وللخصم غُصَّه وعلّه .. الله يمهل سنينه
يعرف جميع الحقايق .. وعنده عليها وثايق = وللهزل ما هو برايق .. وحقِّهْ خذاه بيمينه
ما هو بشخص إتّكالي .. ولا قال عمّي وخالي = بالعكس رجلٍ مثالي .. للكايده ذاخرينه
وأختم كلامي بقولي .. صلوا على أفضل رسولي = داعي الهدى والأصولي .. قدوة لنا تابعينه