يا الله يا اللي كل خلقه ترجاه = يالواحد المعبود يا الدايم الحي
يا اللي جعلت أشكال وألوان وأشباه = وخلقت ذا صالح وذا خلقته سي
وقت الرخا يا كثر الأصحاب كثراه = وعند اللزوم تقول ملحٍ على مي
وكم صاحب تتعب من أجله ولرضاه = وليا بغيته في الشدايد ولا شي
وقت السعة يا كثر هرجه ومجراه = ويقول أنا عنتر وأنا حاتم الطي
مغير شخصية وكشخة مسوّاه = بشتٍ وثوب وغترةٍ تكمل الزي
هذاك جعل اللي هجيج توطاه = وشكله يجي في الأرض معدوم وشوي
وعساه يفدا اللي ليا ضقت تلقاه = قدمك يقول المشكلة خلّها لي
ويشاركك في الهم صبحه وممساه = ويبشّرك بالحل مع طلعة الضي
مهتم من همّك ومسعاه مسعاه = نعم الصديق الصّادق إلاّ هو الخي
يارب تحفظ كل صادق وتحماه = وتمدّْ في عمره ويبطي وهو حي
والختم صلى الله على عبد مولاه = إعداد رمل بين باريس ودبي