أبدى بذكر الوالي ذو العز والجلالي = ولا أنسى النبي الطيب بإجابتي وسؤالي
وآثني الأقوالي وأشكي من العذالي = راعي الكلام الطيّب لاجاك وإلاّ جالي
إن قابلك في المجلس تسمع كلام حالي = يجعلك أخٍ وحبيّب ويمدحك دون أفعالي
وإن جا ومكانك خالي ينشرك بالأقوالي = يزعل لك القريّب والمعرفة والغالي
وخصوص إذا ما أستغنى يهرج بليا معنى = يجعلك في مواقف مالك بها مجالي
وإن جاك يبغى حاجة يرخط كما الدجاجة = يبكي وقلبه الأسود يشعل عليك إشعالي
وإذا أنتهى لزومه صد ورفع خرشومه = عز الله إن ذا تافه وإنه من الأنذالي
تكفون يا أهل الشيمة وأهل الشرف والقيمة= صدوا عن النميمة وهروج قيل وقالي
راعي النميمة كبه وأرجوك لا تحبه = تراه يأخذ منِّك ويحملك حمّالي
يأخذ جميع علومك وعند الرفيق يلومك = يقصد خراب السمعة مهما يكون الحالي
وإذا لقاله دقّه ثوبه عليك يشقّه = بايعك لو يتكلف برخيص ولاّ غالي
فمن كان ذا طريقه الله ينشّف ريقه = ويصيب قلبه علة ويموت ماله تالي
ويا سامع إسمع منّي ولا تختلف عن ظنّي = وأنا ترى لي هقوة فلا تخيّبْ الآمالي
آقولها لإخواني والربع والعواني = واللي بيسمع هرجي وأختص بالعقالي
هذا وخير ختامي للمستمع سلامي = تحية من قلبي بإسم الإله العالي