بسم الله الرحمن الرحيم
قصيده للشاعر سعد فالح بن هيال
‏بمناسبة زيارة الشيخ عبدالله بن عمير بن مشاري ال عمير
‏شيخ قبايل بني منبه شهران ومرافقيه
‏الى اسرة ال جبرين بالقويعيه

الشعر قام اليوم يزهو ويختال
بقصيدة نبض المشاعر كتبها
والفخر قبل الحبر فوق الورق سال
بفعل القروم اللي ينومس نسبها
من بيشة بن عمير باصوغ الامثال
وانثر معانيها وابين سببها
محملة بالطيب من كل الأشكال
وفيها تمر بيشة وفيها رطبها
وصوب القويعية تودى بمرسال
وعلى ديار الجود تمطر سحبها
أرض الذهب قد سميت عبر الأجيال
وأنا بأقول أن الذهب هم عربها
رجال عز وطيب وقروم وابطال
ونفوس طيب طيّب الله شببها
واخص بن جبرين فارس وخيال
وراعي فعول بالمكارم كسبها
شيخ لعسرات المواقيف حلال
ومنصى من صدوف الدهور وكربها
اللي جمعها كلها اعمام واخوال
وبيوت عز ما يجارى حسبها
واسم بنى له فوق الامجاد منزال
ونفس تعلت للمعالي رتبها
وربعه بني زيد مسمين الافعال
سلم السلام وحرب من هو حربها
صدورهم للضيف منزل ومدهال
وترحيبهم سعد الضيوف وطربها
يوقف لهم تاريخ الامجاد باجلال
لانهم سنا عينه ولانهم عجبها
وتمرهم الازمان حال بعد حال
وخيمة مكارمهم جويد طنبها
سيل على نجد من الجال للجال
يزرع مباهجها ويمسح تعبها
وماهي دعاية بث وارسال جوال
الا حقيقة ربك اللي وهبها
ومشاعر من صافي القلب تنقال
لاهل القويعية وسادة عربها

(سعد بن هيال)