يا الله يا عالم بدورات الأزمان = يا جاعلٍ العلم ضِد الجهاله
قدّرت ما بيكون عالم بما كان = وفرَّقت من بين الهدى والضلاله
ومن العدم خلقت وأوجدت الإنسان = جيلٍ رحل والجيل الآخر بداله
هذا يعبد الله وذا عند الأوثان = وهذا على الفطرة يربي عياله
يزرع بهم الإحسان وأعمال الإحسان = ومن يفعل المعروف يلقى الجزا له
هذا الأمل هذا الرجا يا كحيلان = أطيب هدية جاتني في الرساله
هدية ما تنتقيّم بالأثمان = ولا يمتلكها تاجر بكثر ماله
ولا تنجلب للسوق لو كان ما كان = ولا تنوجد معروضة في الوكاله
البر من أقوا الدعايم للإيمان = ومن وصل يلقى من يقوم بوصاله
عبدالعزيز الله يرفع لك الشان = ويدلّك لدرب الوفا والشكاله
ويكفيك شر إعداك إنسي وشيطان = ويجعلك موفي حق راعي عداله
وصلى الله وسلّم على نسل عدنان = ما بانت إنجومه ونوِّر إهلاله