النوم زلت حزتـه وانتحـاء الليـل
وانقض معلوق الضميـر المهـاوي
اشكي على ناصر زعيم الرياجيـل
ولاعلى غيـر المجـرب شكـاوي
من اللي زهى نظم الذهب والخلاخيل
وحبه لراعي الصنف شر وبـلاوي
والتلبنـي مالـي لبيتـه مواصيـل
ولايجيـه الا الشجـع الـجـراوي
يضوي ويصبـر لتعـب والتناكيـل
كنـه شليويـح القديـم العـطـاوي
ماهوب ينقل فـي يمينـه صماليـل
فـرده بمخباتـه وثوبـه سـمـاوي
هاذي علومـي يامعنـي المعاميـل
وانـا لـرد العلـم منكـم شفـاوي
تذكر مراكيضك ليا غابـت الخيـل
وسيلك على مقضى لزومي نحـاوي
وانا على حوض المنى وارجي سهيل
يبدي لنـا حتـى يحـل الدعـاوي
يوصلني اللي لـه عيـون مضاليـل
معـزل المثـنـاه والـعـود راوي
اللي جعلني من حسـاب المهابيـل
واشفق على شوفه وهرجـه يـداوي
[/poem]
حي الكتاب تحية القـاع بسييـل
كتـاب منهـو للمعانـي نقـاوي
ابن اليتيم ارسل علـي المراسيـل
وابدى لي اسراره وماكان حـاوي
وانا زبون اسرار قرم الحلاحيـل
لامادحن نفسي ولاهـوب غـاوي
شكواك شالتني من القـاع تشييـل
وحسب الثقه فيكم قرنت التسـاوي
باجيك لين اجيب لك صفوت الجيل
اللي عيونه مثـل عيـن النـداوي
اسير وادور لمـن لـه مداخيـل
عليه وادفع من حلالـي كسـاوي
واحط جلسـه للقلـوب المغاليـل
يرتاح من الجلسه ضمير الشقاوي
فن كان سدينا على الفعل والقيـل
والا زهمنا لـك جنـود العـلاوي
قوم ليا زاعت تـزوع المنازيـل
شقاقة القربـه وغيـث السنـاوي
لاخير فـي هـرج بليـا دواليـل
ودليل هرجي يوم وقت العـزاوي
[/poem]