يالله يا معلي سقوف السماوات = والأرض باسطها وساع الميادين
يا مقسمٍ المجتمع في جماعات = قسم صحاح وقسم منهم مجانين
بعض البشر حيين لو إنهم أموات = والبعض منهم ميت في شكل حيين
وناس مرضهم شين ماله إعلاجات = لو يجتمع لأجله جميع المداوين
مثل مرض من يعشق الإستراحات = اللي نسى بيته ونسي البزارين
مع شلته ومضيع كل الأوقات = ما بين بيلوتٍ وشيشة وتدخين
وسواح بالريموت بين القناوات = ولو تنصحه قال أعرف الزين والشين
هذا مرض ومن أخطر أنواع الآفات = لمن شاف نفسه صح والناس غادين
ومسويٍ نفسه فهيم وقداوات = وهوْ مخالف طبع ومخالف الدين
يا هيه يالقايد زعيم البهاوات = ما قلت لك روِّح وحرر فلسطين
أدّْ الفروض وصل كل الصلوات = وجنِّب طريق أهل الردى والشياطين
وإحرص على المقبل وخل اللذي فات = قبل الحساب وقبل نصب الموازين
وختامها صلوا عدد ذكر الآيات = على النبي الهاشمي يا مصلين