عليك من خلي وصوف ٍ قليلات

لا ياغزال ٍ في محل ٍ خلاوي
..........................عليك من خلي وصوف ٍ قليلات
محجر ورمش ٍ فوق الأوجان ضاوي
..........................وعنق ومخاذع وإلتفات ٍ بصدات
وصفك ووصفه يا غزال متساوي
.........................ويمتاز عنك بعدة أوصاف حلوات
يفرق بعين ٍ مثل عين النداوي
..........................وعليه من شيهانة الشط أشارات
سود ٍ عيونه يخلفن الهقاوي
..........................ويثر بصدر مولع القلب دقات
عليه يكويني من الحب كاوي
............................كي المريض اللي بعد كيته مات
فقير من فقده بشوفه غناوي
.............................يسير في حبه ليال ٍ طويلات
مريض لو يفحص عليّ المداوي
...........................يصعب عليه ويشتبه فالأشاعات
ولو قلت أباخذ فحص قلب وكلاوي
...........................مابان لو منه المعاليق خطرات
جرح ٍ لجا والله على الكل قاوي
..............................علاّم بالبيـّـن وبالمستكنات
الحب نقص بكل قلب ٍ شقاوي
...........................ودواه ما يورد على الصيدليات
ماله علاج ولا طبيب ٍ يداوي
.........................إلا أنت يا راع العيون الكحيلات
يا غصن ريحان ٍ على الحوض راوي
.........................يعدل عليه من المدي عشر مرات
عليه ساق العين ماش ٍ نحاوي
...........................ريـّـان عوده والزماليق غضـّـات
ماله حليٍّ بالحضر والبداوي
...........................ولا بالقرى يوجد ولا بالجزيرات
إلا عليه من الغزيـّـل مهاوي
..........................خشف ٍ من أصوات المصاليع حذرات
وساعة ماشوفه كن جوي خلاوي
...........................كني ورى البيبان دوني خفارات
أعوي عوى ذيب ٍ حدوه الشواوي
.........................مفلس وجار ٍ له من الجوع لوعات

يفرق بعين ٍ مثل عين النداوي
..........................وعليه من شيهانة الشط أشارات

شكرا لك الطرح الراقي

ولاهنت على البيت السابق وذكر الشط
هههههههههههههههههههههه

قصيده رائعه سلمت يالغالي

وفالك الطيب

ابو عبدالعزيز لاهنت على مرورك العذب
على راسي الشط واهله
الاخوه والمحبه والعنوه بيننا قديمه
عمرنا ما ننسى الشط
دمت بحفظ الرحمن

قصيده رائعه
لاهنت يا ابو طلال
تحياتي واحترامي

قصيده رائعه
في غاية الجمال
تشكر عليها
دمت بود

سود ٍ عيونه يخلفن الهقاوي
..........................ويثر بصدر مولع القلب دقات
عليه يكويني من الحب كاوي
............................كي المريض اللي بعد كيته مات

بوطلال
القصائد المميزه والرائعه
لاينتقيها إلا شخص يملك ذائقة
عاليه وانت احد هؤلاء القلائل
لاعدمنا ذوقك يا كل الذوق

صقر بني منبه
سيف بني منبه
ابو مهند
إشادتكم تاج على رأسي
لا عدمتكم ياغالين