سو الليالي

ياونّتي ونّة وحيدٍ خلاوي=ماله عوينٍ في حياته يقدّيه
اللي زواه من المحسّات زاوي=ما احدٍ خذى شوره ولا احدٍ يماليه
ويحداه من قشر الليالي حداوي=ويصيح ماله من عوينٍ يناجيه
ظروف وقته والشقا والبلاوي=جاحت بكبده واظهرت كلّ خافيه
وكنّه مع ربعه مثيل الجلاوي=اللي جلا من شان فرقى معاديه
لاهوب لاعاهه ولاهوب غاوي=ولاتنجهل وقفاته ولا مواريه
لكن غناته دونها الذيب عاوي=ويلحقه من الادنى والاقصى مشاريه
لاقال جرحي دوّروا له مداوي= قالوا له ان جرحك صعيبٍ نداويه
فقره يحطّم مابنته المناوي= هدّام حلمٍ طايلاتٍ مبانيه
فيالله تعجّل بالفرج وانك تاوي=وانك تعين اللي فقير وتغانيه
يامسقي الدّار الجفاف السناوي=اغنه بفضلك يامجيبٍ لداعيه
من شان يكفخ مثل حرٍّ نداوي=ماهوب يرجي غير ما اعطاه واليه
وينفكّ قيده بعد كثر الزراوي=ويسجّ يوم الله من الخير عاطيه
ويحقق طموحه بعيد الهقاوي=ويبلج حجاجه يوم تحمد مساعيه