ان حضرنا بانتجمل وجملنا لحانا

نذكر الله في نهاية الامور ومبتدانا =جلّ شانه خالقٍ خلقه الواحد الاحد
بعدها يامرحبا بالضيوف ومن لفانا=عدّ ودّانٍ نصوبه تقفاها برد
مرحبا يامن لفا من محبتنا وجانا=مرحبا باسم القبيله ونايبها حمد
وارحبوا ثمّ ارحبوا ياصدقانا وزملانا=قلتها باسمي نيابه عن الرايد سعد
ماخفى في داخل القلب ينطقه اللسانا=من فرح وسرور والا معاداه ونكد
فياقصيدي يوم شديت لارضاك العنانا=مدّ لي يمناك وآشدّها ولاترد
لان قصايدنا وسايل توصّل مبتغانا= والسعد يوم اجتمعنا وياليل السعد
دافع الشيمه على الشيمه العليا حدانا=ومن معه شيمه وغيره على القمه صعد
ان حضرنا بانتجمل وجملنا لحانا=لاحتمى الميدان والشعر في بدعٍ ورد
ونستشير القدوه العارفين من اشورانا=ما علينا منك يامن حدر والا سند
والنظر قدام قدام مايرجع ورانا= ميزةٍ فالعود الاول توصى ابها الولد
ونتجاوز بعض الاشياء ولانرضى الهوانا=وان حضرنا فالصعيبات حلّينا العقد
تربية عودٍ محنّك على القاله ربانا=جعل عينٍ ماتطيقه يطاولها الرمد
وان شنانا واحدٍ قلت يا جعلك فدانا=يكفي انا لاحضرنا شف امثالك تصد
ويترك العزوه رديٍّ تعزوى في قفانا = لاعتزيت وقلت ويش انت؟ وانا اخّو سعد