قصة اليتمان

هذي سالفة قديمة لاثنين إخوان , واحد مطوع وماسك المسجد والثاني زكرتي ( هاوي قنص ) إذا اصبح الصبح سرح الزكرتي وخذى طيره وسلوقيه وراح يتصيد وهم يتمان متوفية أمهم وابوهم وله خالة مطرفة عنهم شوية ويقوم الزكرتي بخدمة الخاله وعندها بنت ويقوم بخدمة خالته علشان بنت خالته ويبيها ويغازلها ومهتويها وهو على نقى في مغازله . جا ذاك الليل وزين العشا لخوه قال اخوه المطوع يافلان قال نعم قال انا طالبك مطلوب قال لا تطلبني انت اخوي واكبر مني تامر امر قال طالبك تقول تم قال تم قال انا بروح احج وابيك تمسك المسجد مكاني لين اجي قال الله يرحم الحال وانت خابرني فيد مسجد والا حول مسجد وانا من الفجر اقوم واتصيد واروح لخالتي واقوم بخدمة خالتي قال المطوع خالتك تروح لها يوم الجمعة حنا ماعندنا صلاة جمعة في الديرة انت تصلي بالجماعة من السبت الى الجمعة الفجر ثم تروح لخالتك تخدمها لصلاة العصر ثم تعود تصلي بالجماعة العصر قال الزكرتي منيه للصباح خير في خاطره انه يهود والا يستخير والا خوياه مايجون صلوا للفجر واذا بخويا خوه المطوع جاين للمسجد قال اخوه المطوع يوم صلى بهم يالربع سامحوني وبايحوني وحللوني انا رجال حجاج وبحج قالوا الله يسامح والله يستر عليك وتجي بالسلام غير منهو اللي بيمسك المسجد مكانك قال المطوع اللي بيمسكة خوي فلان شافوه الجماعة في المسجد يعرفون ان خوه الزكرتي ماهوب فيد صلاة والا يم صلاة قال لا انشالله فيه خير وبركة .مشى وتوادعوا عاين فيهم لين راحوا ودرى ان المحبالة امسكته ووصاه اخوه قال انا معود الجماعة بعد كل صلاة عصر اقرى بهم حديث والا حديثين , وصوت اخوه الزكرة طيب صللى بهم ذاك النهار ثم جا وقت العصر وصلى بهم ثم مسك كتاب الحديث وقرى الحديث بطريقة الشيلة للقصيدة ,جاز الصوت للجماعة وقالو الجماعة ليت خوك حاج من مبطي ماشالله تبارك الرحمن على هالصوت الزين , اخذ ثلاثة ايام اربع ايام قالت خالتهم ابي اروح انشد عن فلان وش بلاه لنا خمسة ماجانا وماهي معقوله اخاف انه مريض والا فيه شي راحت ودجت في الديرة وقالت يامن يخبرني عن اليتمان وش الدنيا بهم وش امورهم قالوا اليتمان طيبين ولا بهم لوم واحد حج وواحد في المسجد قالت اكيد اللي حج فلان هو راعي الطروق اللي يجينا والزكرتي قالو لا والله اللي حج المطوع والزكرتي في المسجد قالت فلان في المسجد قالو نعم قالت الله يهدي من يشاء خابرته لاهوب يم مسجد . عودت لبنتها وقالت فلان طيب وعانيه في المسجد قالت انا ماصدق انه ماسك المسجد ابيك تسمحين لي واروح اشوف راحت البنت تزينت ومشت اللحين وقت صلاة العصر اليوم السادس يوم انها جات خلف المسجد قال للمؤذن اقم يقيم تقدم في المحراب والتفت للجماعة وقال استوو يبي يقول اعتدلوا ولين بنت خالته عند السرحة متزينة وضاربة نفسها بالشيطان الرجيم فقال بجرة الصوت ( تعدلوا ياهل القلوب المواليف صفوا ورى القراي خمسة صفوفي احلف برب يعلم السر والغيب انس مناي ورغبتي واشتياقي ) الله اكبر , صلى بهم ماهوب يم صلاة ولا حول صلاة وبعد ماصلى بهم التفت يمهم وهو مستحى ووراه ولد عم له لكيع وينكت قال يافلان قال نعم قال انا طالبك ان تعيد الحديث اللي قلته بين الاقامة وتكبيرة الاحرام . فرد واحد ثاني قال لا يافلان هذا حديث اسناده ضعيف ضعيف جدا جدا ولا يعاد .

الله يعطيك العافيه
لاهنت يا ابو عبدالله
تحياتي واحترامي

الأخ العزيز / صقر بني منبه



يعجز اللسان عن الكلام تجاهك ولكنني أقول لك باختصار :







و










وتقبل فائق تقديري واحترامي ,,,