قصيدة زوجة الامير نايف في الامير نايف

​العام يا أم سعود كان الحزن ضيف
واليوم دق اوتادة الحزن فينا


الحزن غيمه غيبت نجمه الصيف
وباأسباب جوره ياجواهر شكينا


غاب الحبيب وﻻبقى للهنا طيف
واﻵه يانوره تهاوت علينا


كن الظهر ياسعود فيه انغمد سيف
والصدر صار لكل اﻻوجاع مينا


اقول يامحمد متى فارق وكيف
واصيح ياسارة متى هو بيجينا


يانوف من عقبه ترى بسمتي زيف
جف الفرح من حولنا وانطفينا


أبوك يانواف ماله تواصيف
وانشد مشاعل كان مثله لقينا


والكون ياهيفا بلا ظله مخيف
واعذر بكانا يافهد لو بكينا


كان القمر كان البحر والمجاديف
كان الحنان اللي بحضنه دفينا


وكان الملاذ لشاكي الضيم والحيف
كم شال عنا كم خذا عن يدينا


عاش ورحل كله مهابه وتشريف
جار الحرم فوق الحكي وان حكينا


والله لو كان المقدر على الكيف
ماغبت يا نايف وﻻاحنا ظمينا


كل مارخيت الجفن جدت عواصيف
والشوق ثار وفارقتني السكينه


وشفتك مثل شمس بروس المشاريف
نورك يناديني وانا اقول وينه؟


والقاك واصحى والمحك راقي النيف
حي ولو صلت عليك المدينه


أحسك بجواي ماهي تخاريف
ياساكن عيون المهاه الحزينه


في ذا جلسنا بين صمت وسواليف
وفي ذا الممر اثنينا كم مشينا


وفي هالزوايا كم جمعنا مواليف
وياما على ذيك المرايا ضوينا


عشره عمرماتنتهي بالصواديف
وذكرى تبي تحيا ولو مابقينا


الموت يانايف كتاب وتصاريف
وحنا بحكم اللي خلقنا رضينا
　
　
　
غيوض -


مها محمد السديري

رحم الله الفقيد الامير نايف واسكنه فسيح جناته

وصح الله لسان قائلة هذه القصيده



شكرا لك على طرحك المميز
تقبل مروري

رحم الله النايف واسكنه فسيح جناته
قصيدة مؤثرة ومن اصدق قصائد الرثاء
تنبع من احساس صادق -
صح لسان قائلها وناقلها
تقبلوا مروري وتقديري واحترامي

رحم الله ناصر السنه نايف بن عبدالعزيز واسكنه فسيح جناته سلمت يمناك اخوي الشيهان ودي وتقديري

قصيدة رائعة



بيض الله وجهك

والله يعطيك ألف عافية

-- تحياتي --

الله يرحمه ويسكنه فسيح جناته
قصيدة رائعه
يعطيك العافيه
تحياتي واحترامي

الله يرحم نايف ويغفر له ويدخله فسيح جناته

الله يرحمة ويسكنة فسيح جناته

قصيدهـ رااائعهـ
الله يرحم موتانا و موتا المسلمييين
يعطييكـ الــــف عاافيهـ
في انتظاار جدييدكـ الممميز

تحياااااتي