لقينا الشاهد مهداني ... ظافر بن وهيب

بسم الله الرحمن الرحيم

الحمد لله رب العالمين والصلاة والسلام على أشرف الأنبياء والمرسلين

سيدنا ونبينا محمد وعلى آله وصحابته أتم الصلاة وأفضل التسليم أما بعد :

هذه القصيدة مهداة للأخ الغالي/ سعيد بن علي بن حلاص المهداني القحطاني

بمناسبة الحفل الخاص ببناء منزل وضيافة لوالده بمحافظة تثليث مركز المضة

قرية الحفاير بتاريخ 14/12/1435هـ

والقصيدة تعبر عن نفسها .. آمل أن تنال إعجاب وإستحسان الجميع

وهي بعنوان : لقينا الشاهد مهداني

يا الله يا اللي تشرق الشمس بأمرك = يا ربنا المعبود يا رحماني
يا مخرج الكمأة ويا منبتها = يا مقسمٍ خلقك على الأوطاني
ويسّرت ملفانا لمن نغليهم = وأهل الحفاير شانهم ذا شاني
فسلام للوافين وأصحاب الوفا = أهل الوفا مع جارهم والعاني
وأهل الدلال اللي بها بن اليمن = وبهارها مخلوط خمس ألواني
العود والعنبر وهيلٍ هندي = والزعفران ومستكاه إعماني
وأهل البيوت اللي يظلل ظلها = ومزبنين المستجير الجاني
وأهل الكرم والجود في من جاهم = تذبح أكبوش وتنحر القعداني
عيال عودٍ ما تهاب من العدا = قضاية اللازم حما الحداني
والنعم كلٍ قد وسمه بميسم = لكن لقينا الشاهد إمهداني
وإبن حلاص وكل منهم حوله = أصحابي الغالين إلاّ إخواني
فجعله على القوة بناك المنزل = حظ الوفود وحظ للضيفاني
ومهما أقول ولو بغيت أواصل = مدحي لكم تعجز به القيفاني
فأنتم كما شمس الضحى الوقّادة = كلٍ يشاهدها بعيد وداني
وأفعالكم ماني بمن يذكرها = تاريخكم يشهد عبر الأزماني
ومنكم شيوخٍ وأهل حرب وحربة = مثل الفديع وشالح الهدلاني
والشيخ ذيب وليت مثله واجد = في كل بد معرّب الجدّاني
ومثل المهادي يوم جاه مفرج = رحّب به وجازاه بالإحساني
نبذة بسيطة عن رموز الماضي = واليوم كم من شيخ كم صنياني
ولو نوجز التاريخ واللي نعرف = نحتاج مع ذا الليل ليلٍ ثاني
والعلم تقديري وشكري كلّه = لسعيد واللي ليته أدنى داني
من دون قاصر في ربوعي كلهم = أبو علي مثل الجدي قد باني
فعله معي دايم يبيّض وجهه = وكم موقفٍ جمّل بي وكفّاني
وأنا هنا جاي أمثّل قيفي = بني مظيم الوهَّب الشجعاني
فلا جيتكم ما هو بفضل منّي = ولا أحْدٍ يقول تجمل الشهراني
هذي مواجيب وعلومٍ غانمة = وأنتم هل الماجوب يا قحطاني
وختامها صلوا على سيّد البشر = المصطفى والمرسل العدناني

وســــــلامتــــــكم

أسأل الله لنا ولكم ولجميع إخواننا المسلمين التوفيق والسداد

في القول والعمل إنه هو السميع المجيب

وتقبلوا خالص تحيات أخوكم شاعر الفيحاء/

ظافر بن وهيب الواهبي الشهراني

صح لسانك يابو وهيب
وخير من يمثل شهران في مثل هذه المحافل
كفيت ووفيت وبيض الله وجهك


تقبل مروي ولك من اعذب التحايا